An diskouezadeg-red-mañ a zo kinniget da skolioù, ensavadurioù hag aozadurioù Breizh. Gallout a reer kaout anezhi e galleg pe e brezhoneg. Evit kaout anezhi, kit e darempred gant Skol-uhel ar Vro, pellgomz: 02 97 68 31 10. Diskouezadeg empentet ha savet diwar Atlas Breizh Mikael Bodlore-Penlaez & Divi Kervella evit Skol-Uhel ar Vro. Empentet eo bet Atlas Breizh gant skoazell arc’hant rannvro Breizh ha sikour teknikel Ofis publik ar brezhoneg. Klikit amañ evit dizoloiñ an diskouezadeg e PDF Fichenn deknikel evit an aozadurioù a zegemer an diskouezadeg

Kreñv-spontus eo deuet da vezañ nerzh ar skeudennoù er bed a-vremañ. Alies-mat e kemeront o c’hreñv war ar skridoù pa c’hallont bezañ komprenet war ar prim, daoust m’eo gwir e c’hallont bezañ treuzkomprenet a-wechoù ivez hervez doare gwelet pep hini. Emañ ar c’hartennoù etre an daou zoare-se. Mesket e vez enno ar skeudenn hag ar skrid, ha ne vez ket ezhomm bezañ kelaouet hiroc’h evit kompren anezho, da vihanañ kement-se eo pal uhelañ ar douaroniourien hag ar gartennourien. Kontañ traoù a ra ar c’hartennoù, reiñ da gompren, heñchañ an dud hag a-wechoù ivez skeudenniñ ur gaoz pe ur c’hoant. N’eus kartenn neptu ebet; evel kement tra a zo n’eo nemet frouezh an doare ma weler ar bed.

Savet eo an diskouezadeg “Kartennoù evit kompren Breizh” diwar Atlas Breizh. Kemeret eo bet ennañ an holl gartennoù a c’haller gwelet amañ. Gallout a reer kaout ur gwel sintetek eus gwirvoud Breizh, eus he douaroniezh, hec’h istor, he sevenadur, hec’h ekonomiezh hag, evit ober berr, eus ur bern traoù hag a ya d’ober Breizh. Emañ ar pouez gant ar c’hartennoù en diskouezadeg-mañ. Degaset e vez ar gaoz gant ar skridoù met gant ar c’hartennoù emañ ar perzh pennañ...

[Klikit amañ evit gwelet deiziadoù hag lec'hioù an diskouezadeg] (Pajenn e galleg)